جانب من حوار سرّي بين جون كيري ومسؤول جزائري

المسؤول الظاهر بالصورة ليس هو المعني بالحوار

جون كيري: واش رايك لو كان نفتحو في كل بلدية عندكم مطعم ماكدونالدز؟
مسؤول جزائري: شوف يا سي كيري، احنا نعطوكم تكاليف المشروع وأرباح كل عام بلا ما دريحو حتى شي.. وخلونا مع الدوبارة

والقرانطيطا واللوبيا.. شعبنا يحبّ ياكلها سخونة وحارّة..
جون كيري: أنا أتفهّم خصوصية المطبخ الجزائري وأحترم ذوق شعبكم.. واش زعمة لو كان تساعدونا بخبراء في الدوبارة

والقرانطيطا.. يمكن نستثمر تقاليدكم في حلّ مشاكل العالم؟
مسؤول جزائري: واش فيها.. بصحّ لازم الدولة اللي تفتحو فيها محلات دوبارة وقرانطيطا يكون عندها ميزانية خاصة لتجديد
قنوات صرف المياة القذرة كلّ خمس سنوات.

جون كيري: احوجي.. علاش راكم تجددوا في قنوات صرف المياة القذرة كلّ خمس سنوات؟
مسؤول جزائري: عندك الحق تستعجب لاخطراش انتوما خادمين لقاذوراتكم بلاد تحت الأرض باش ريحتكم ما تفوحش.. واحنا الريحة تفوح كل خمس سنين لاخطراش احنا تاع الديمقراطية الصحيحة.

جون كيري: راني شميتها من بعيد.. على جال هذي اقترحت عليكم ماكدونالدز.. ما يديرش الريحة.
مسؤول جزائري: العالم كامل شم ريحيتكم إلا الشعب الامريكي.. أمّا أحنا شعبنا اللي يشمّ برك.. وهذا الفرق بين الجزائر وأمريكا.

جون كيري: راك طيّح، اعرف واش راك تقول هاه..
مسؤول جزائري: واش رايك لو كان نبدلو الهدرة ونضيّفوك على قرانطيطا والا دوبارة ومن بعد نتكلمو؟

جون كيري: هذي شوفة.. وسياستكم تعجبني "اطعم الفم تستحى العين".
مسؤول جزائري: هاي فاه تعجبني أمريكا.. عينها تستحى وفمها مشرّع على الدنيا كامل.

جون كيري: هههه.. يخي راكم تقولو "ادهن السيّر يسير".
مسؤول جزائري: ونقولو ثاني " اللي قراها الذيب، حافظها السلوقي".